ILOILO CITY – Ginreklamo sang mga pumuluyo ang nagabaha nga basketball court sa Brgy. Kasing-Kasing, Molo, Iloilo City.
Sa interview sang Bombo Radyo kay Corazon Bernaldez, sang nasambit nga barangay, iya ginpahayag nga isa na ka semana nga nagabaha ang ila basketball court bangud naga-ilig pakadto didto ang naga-awas nga drainage halin sa balay sang iban nga mga pumuluyo.
Suno pa kay Bernaldez, wala nagagana ang drainage system sa ila barangay rason nga nagabinaha.
Malangsa kag mabaho pa suno sa natungdan ang tubig nga yara sa basketball court.
Samtang, ginpahayag naman ni Barangay Kagawad Alfredo Aquio nga madugay na ini nga problema sa ila barangay sa diin binulan pa nga nagatinir sa ila basketball court ang tubig.
Dugang pa ni Aquio, may yara na sila sang nakahanda nga solusyon nasambit nga problema nga ginareklamo sang mga pumuluyo.
May yara naman sang motor suno kay Aquio nga ginpahamtang agud magsuyop sang tubig nga nagatinir sa nasambit nga basketball court apang ini ang naguba.
