MOLO ILOILO CITY– Kapin sa 10 ka mga estudyante sang Iloilo City National High School sa Molo, Iloilo City ang ginapahayag ginsudlan sang malain nga espirito.
Sa interview sang Bombo Radyo kay alyas Christine,12, kag isa sa mga ginsudlan sang malain nga espirito, iya ginpahayag nga wala siya nakahibalo kun ano ang natabo sa iya.
Suno kay Christine, may nakita siya nga siyam ka tuig nga bata nga lalaki kag nagabitay sa puno sang sambag sa ila eskwelahan.
Ginpahayag ni Christine nga nagapangayo ang bata sang hustisya sa iya kamatayon.
Nabatyagan man niya suno kay Christine nga ginkadenahan siya sa kamot agud kuhaon sang bata nga lalaki.
Pagkatapos niya nakita ang nasambit nga bata suno kay Christine, hinali lang nagsulod sa iya lawas ang espirito sang amay sang bata.
Samtang yara sa sulod sang iya lawas ang espirito sang amay, nakabatyag si Christine sa pagbudlay sa pagginhawa kasubong sang ginakuga.
Pagkatapos nga maumpawan, nakabatyag siya suno kay Christine sang pagpalangapoy kag pagpalangluya sang iya lawas.
Samtang, suno naman kay alyas Barbie, 14, kag isa man sa ginsudlan sang malain nga espirito, may nagapahog sa iya nga tatlo ka mga bata.
Ginpahayag ni Barbie nga nagapangayo ang tatlo ka bata sang hustisya sa ila kamatayon.
Nakita niya suno kay Barbie nga dinumaan na ang uniform nga ginasuksuk sang tatlo ka mga bata.
Nabatyagan man niya suno kay Barbie nga nadulaan siya sang pwersa bangud sa natabo.
Ginpahayag naman sang manunudlo kag classroom adviser nga si Juliet, nga nakapanugid sa iya ang mga estudyante nga may nakita sila nga sunog nga hitsura kag sunog nga tiil.
Isa man ka estudyante niya ang nanugid suno kay Juliet nga nag-istorya sa iya ang espirito sang isa ka bata kag naghambal nga indi pagtandugon ang cabinet nga yara sa sulod sang classroom.
Ini bangud nga nagaserbe ang cabinet nga ila puluy-an.
May mga tion man suno kay Juliet nga mabatyagan ang pagdapya sang malamig nga hangin kag hinali nga pagsarado sang pwertaham sang ila classroom.
Gilayon naman nga ginpaidalom sa prayer healing ang mga biktima.
