GUIMARAS – Ginapangitaan sang paagi sang Guimaras Provincial Government kun paano mabuligan ang Mango Planters kasunod sang pagpauntat sang Manggahan Festival bangud sa Coronavirus Disease 2019 (COVID-19).
Sa Good Morning Philippines program, ginpahayag ni Gov. Samuel Gumarin nga ginalauman nga magalab-ot sa 20 metric tons nga paho ang anihon para kun tani sa Manggahan Festival.
Suno kay Gumarin, kanugon ang prutas sa tion nga indi mabakal bangud sa ginapatuman nga Enhanced Community Quarantine ukon lockdown rason nga ginapangitaan sang paagi sang Local Government Unit nga makapangita sang buyer.
Ginpahayag ni Gumarin nga bagsak-presyo ukon tuman ka barato ang paho agud nga mapaubos na lang ang nabilin nga supply.
Sa subong suno sa gobernador, daku ang nangin epekto sang COVID-19 sa industriya sang paho sa Guimaras.
Samtang, mahimo nga sa masunod nga inadlaw, ideklarar na ang Level 2 Lockdown sa Guimaras.
Sa pagpaathag ni Gumarin, ang nasambit nga deklarasyon ang pagpanghanda na sa Level 3 Lockdown kun sa diin dumili-an na ang mga residente nga magguwa sa balay sa sulod sang 14 ka adlaw.
Ginpahayag sang gobernador nga ang nasambit nga lihok ang paagi sang Guimaras Provincial Government agud nga masiguro ang seguridad sang kadam-an.
Pagkatapos sang lockdown, ipaidalom man sa quarantine ang tanan nga responders agud nga masigurado nga wala sila nalatnan sang virus.
