ILOILO CITY – Magapangatubang sang kaso sa Sandiganbayan ang ginabanta 40 ka mga anay opisyal kag empleyado sang Bureau of Immigration (BI) bangud sang gina-alegar nga kaangtanan sa “pastillas scheme” nga nagahatag sa mga foreigners nga makasulod sa pungsod sa mas mahapos nga pamaagi.
Gin-aprubahan ni Ombudsman Samuel Martires sang Mayo 27 ang pagpasaka sang kaso kag nabaton ini sang Sandiganbayan sang Hunyo 6.
Sa resolution ni Martires, ang mga respondents ang naghatag sang bentaha sa mga Chinese nationals kag nagtuga sang undue injury sa kabug-usan nga 143 ka mga pasahero nga gintumod sang National Bureau of Investigation (NBI) nga nagabalor sa P10,000 ukon more or less P1.43 million.
Kabahin man sa ginkasuhan amo ang tag-iya sang isa ka travel agency.
Ang nasambit nga scheme nga natabo sang 2017 tubto 2020 ang gina-alegar nga gin-imbolbaran sang ginatawag nga “bosses” kag Chinese suppliers nga amo ang nag-akto nga palaagyan sa tunga sang travel agencies kag immigration officers nga amo ang naga-man sa counters sa terminal 1 kag 2 sang Ninoy Aquino International Airport (NAIA).
Ang mga masunod nga immigration officers nga ginkasuhan amo sanday: Former deputy commissioner Marc Red Mariñas, Grifton Medina, Erwin Ortanez, Glenn Comia, Benlando Guevarra, Danieve “Denden” Binsol, Deon “Nancy” Albao, Arlan Edward Mendoza, Anthony “Al” Lopez, Cecille Jonathan Crozco, Francis Dennis Robles, Bradford So, Vincent Bryan Allas, Rodolfo “Totoy” Magbuhos, Jr., ER German Robin, Gabriel Ernest “Gabe” Estacio, Ralph Ryan “RG” Garcia, Phol “Vexana III” Villanueva, Abdul Fahad “Sharpedge Calaca” Calaca, Danilo Deudor, Mark “Fakehappy” Macababbad, Aurelio “Amboy” Lucero III, George Bituin, Salahuddin Hadjinoor, Cherrypie “Chepie” Ricolcol, Chevy Chase Naniong, Carl Jordan Perez, Abdulhafez “HB” Hadjibasher, Jeffrey Dale “Boss Nyefi” Ignacio, Clint Simene, Asliyah Maruhom, Maria Victoria Jogno, Paul Erik “Liza” Borja, Hamza Pagasum, Manuel Sarmiento III, Dimple Mahyumi Mallari, Gerrymyle “Gem” Franco, John Michael Angeles, Francis Meeka Flores, Sadruddin Usudan, John Kessier Cortez, Mohammed Sahary Lomondot, John Derrick Go, Aira Inoue, kag Rovan Rey Manlapas.
Ginkasuhan man sanday BI security guard Fidel Mendoza kag administrative assistant Angelica Omampo, Yanni Hao, George Ong kag Cathy Cu nga amo ang nangin Chinese interpreters.
Ang tag-iya sang Empire International Travel and Tours nga si Liya Wu nga amo ang naghatag sang listahan sang mga pasahero nga naka-avail sang VIP treatment ang magapangatubang man sang graft charges.
Ang mga bosses ukon Chinese suppliers ang nakabaton sang regular pay-outs nagikan sa mga travel agencies nga naka-wrap kaangay sang pastillas nga gintunga sa nagkalain-lain nga myembro sang pastillas scheme.
Suno sa Ombdusman, ang ginatawag nga “Mariñas Team” ang nagpamuno sang “pastillas” scheme.
Ang inisyal nga myembro sang team amo sanday Mariñas, Guevarra kag Mendoza nga ginkaptan sang ulihi sang isa ka Ortanez.
Nagdangat naman sa P90,000 ang ginrekomendar nga pyansa sa tagsa ka mga respondents.
Ginpanginwala naman ni Justice Secretary Menardo Guevarra ang amo nga akusasyon.
Suno sa iya, basahon anay niya ang resolution sang Ombudsman antes maghatag sang reaksiyon.
Suno pa sa iya, ang DOJ ang nagpatigayon man sang parallel administrative investigation pagkatapos sang fact-finding inquiry sang NBI apang ang lista sang mga respondents ang lain sa set sang respondents sa criminal complaint nga ginpasa sang NBI sa Ombudsman.
Gin-welcome naman ni Sen. Risa Hontiveros ang rekomendasyon sang Ombudsman nga mag-file sang graft charges.
Nahibaluan nga si Hontiveros ang nagbuyagyag sang “pastillas scheme”.
