Ginkumpirma ni Labor Secretary Silvestre Bello III nga kapin 4,000 ka mga repatriated overseas Filipino workers (OFWs) ang stranded sa Metro Manila bangud sang P930 million nga utang sang gobyerno nga amo ang nagtulod sa Philippine Red Cross nga isuspinde ang pagpatigayon sang COVID-19 test.
Nahibaluan nga antes makapauli ang OFWs sa ila nga banwa ukon probinsya sa pungsod, kinahanglan nga ipresentar ang negative result sang RT-PCR.
Sang wala pa ginpapanaug sang Philippine Red Cross ang suspensyon sa COVID-19 test, 1,000 tubtob 3,000 ka mga OFWs ang ginapapauli sa ila probinsya kada adlaw, apang sa subong, maximum of 300 na lamang ang sarang mapapauli kada adlaw.
Buot silingon suno kay Bello, masobra isa ka semana ang tinir sang repatriates sa quarantine facilities sa Metro Manila.
Nahibaluan nga kapin 1 million ka COVID-19 tests ang gina-handle sang Philippine Red Cross, apang suno sa talatapan, indi na sila magbaton sang specimen para sa tests nga funded kuntani sang PhilHealth bangud tubtob subong, wala pa nabayaran sang Philhealth ang P930 million nila nga utang.
Matandaan nga una na nagpasalig si Presidente Rodrigo Duterte nga magapangita ini sang kwarta agud masettle bisan ang katunga lang sang utang sa Philippine Red Cross “as soon as possible” kag ang katunga naman sang utang “within a reasonable time.”
