Ginabanta nga P2-million ang balor sang iligal nga droga ang nakumpiskar sang otoridad kasunod sang isa ka drug buy bust operation sa Barangay Sto. Domingo, Arevalo, Iloilo City subong nga gab-i.
Duha ang nadakpan nga amo sanday alias Roel, residente sang amo nga barangay, kag alyas Tan, residente sang Tanza Baybay, City Proper, magbayaw, lunsay gina-identify nga High Value Individuals (HVIs).
Sa interview sang Bombo Radyo kay Police Captain Glenn Soliman, chief sang Regional Police Drug Enforcement Unit-6, iya ginpahayag nga 250 gramos ang ila una nga nakumpiskar sa possession sang duha nga katumbas sang P1.7-million.
Samtang nagapadayon ang inventory, nagkooperar ang asawa ni alias Roel kag nagpanugid nga may dugang pa nga iligal nga droga sa ila nga balay.
Gin-turn over ini sa kapulisan kag santo sa inisyal nga pahayag ni Soliman, nagalab-ot ini sa halos 50 grams nga nagadalagan sa balor nga P340,000.
Pahayag sang RPDEU chief, may rekord na si alias Tan nga nadakpan man sang una bangud sa iligal nga droga, samtang ini naman ang una nga bes nga nadakpan si alias Roel.
Natalana nga mag-atubang ang duha sa panumbungon nga paglapas sa Republic Act 9165 ukon sa Comprehensive Dangerous Drugs Act of 2002.
