ILOILO CITY – Ginabanta pito ka libo nga mga indigent students ang makabaton sang educational cash assistance sa Sabado, Septyembre 24.
Sa interview sang Bombo Radyo kay Atty. May Castillo, spokesperson sang Department of Social Welfare and Development Region VI, iya ginpahayag nga may yara na gid lamang sang nabilin nga P19 million nga budget ang ahensya nga maka-igo gid lamang sa pito ka libo nga mga estudyante.
Ini na ang mangin katapusan nga payout suno kay Castillo magluwas gid lamang kun may yara na sang panibag-o nga guidance nagikan sa central office sang ahensya.
Nagpangayo man sang paghangop ang ahensya ilabi na sa mga nagalaum nga makabaton man sang cash assistance apang wala na sang available nga budget.
Nagpahanumdom man si Castillo nga indi gid magpadulong sa payout venues kun wala nakabaton sang mensahe nagikan sa ahensya nga may nala-indicate nga petsa sang payout.
Kung madumduman, una na nga gin-anunsiyo sang ahensya nga wala na sang may matabo nga payout bangud nga naubos na ang budget apang nagpadala sang augmentation ang central office nga nagadangat sa P26 million.
Sa subong, nagdangat na sa P108, 249, 000 ang nahatag sang ahensya sa rehiyon nga ginalakipan sang 38, 590 ka mga indigent students.
