ILOILO CITY – Ginpamatukan sang transport sector ang ginaduso sang syudad sang Iloilo nga pagpasaka sang multa sa pila ka mga traffic violations.
Ini ang ginpabutyag sang transport sector sa ginpatigayon nga committee hearing.
Sa interview sang Bombo Radyo kay Iloilo City Councilor Sedfrey Cabaluna, chairman sang Committee on Transportation, iya ginpahayag nga base sa sentimyento sang transport sector, wala pa sila nakabawi nagikan sa pandemya.
Dugang pa niya, mas maayo suno sa transport group kun unahon anay sang Public Safety and Transportation Management Office ang professionalism sang mga traffic aides.
Depensa naman sang transportation office, kun mapasakaan ang multa, mahagan-hagan ang mga violations.
Suno pa kay Cabaluna, ginrason man sang syudad nga may direktiba nagikan sa Bureau of Local Government Finance nga dapat na nga i-revisit ang mga fees kag taxes bangud nga madugay na nga wala napasakaan.
Sa subong, wala pa sang nahisugtan ang komitiba bangud nga ginapamatian pa ang magtimbang nga bahin kag ginahulat ang comparison data sang mga multa sang iban nga mga lugar.
