Ginaduso sang Australia, United Kingdom, France kag iban pa nga pungsod nga pahalinon ang Russia sa SWIFT bank-messaging system bilang penalidad sa pagsulod sini sa Ukraine.
Ang SWIFT ukon Society for Worldwide Interbank Financial Telecommunication amo ang kooperatiba sang financial institutions nga natukod sang 1973 kag may headquarters sa Belgium.
Ginauyatan sini ang minilyon ka impormasyon sa hulag sang kuwarta agud nga mabuligan ang mga bangko sa ila nga transaksyon kada adlaw.
Lakip sa SWIFT amo ang 11,000 ka financial institutions sa masobra 200 ka mga pungsod kag teritoryo.
Suno kay Bombo International Correspondent Denmark Suede direkta sa Australia, kun mapalayas ang Russia sa SWFIFT, mabudlayan ang negosyo sang pungsod kag ang pagpakig-angot sini sa iban nga mga lugar.
Kun mautod ang kaangtanan sang Russia sa iban nga international financial transactions, maapektuhan sini ang ginansya sang pungsod pati sa oil kag gas production nga naga-account sang 40 percent sang revenue sang pungsod.
Indi naman ini makabayad kag makapatigayon sang bayad sa financial institutions sang iban nga pungsod nga ginagamit sini sa trade transactions.
