Nagapati ang Tourism Congress of the Philippines nga may malain nga epekto sa industriya sang turismo ang pagduso ni Presidente Duterte sang hagna nga pagpasarado sang mga establisyemento paglab-ot sa tungang gab-i.
Suno kay Jojo Clemente, presidente sang Tourism Congress of the Philippines madamo nga mga negosyo kaangay sang hotels, restaurants kag bars ang maapektuhan sang nasambit nga hagna.
Dugang pa ni Clemente, apektado man ang mga may yara sang ubra sa gab-i kaangay sang mga call center agents kag mga food service.industry workers bangud posible nga ipasarado ang mga gina ubrahan sini kun ini ang mapatuman.
Suno pa gid sa natungdan, ang nightlife sa Manila ang isa sa mga naga engganyo sa turista nga magkadto sa Pilipinas kag dako ang mabulig sini sa turismo sang pungsod.
Nahibaluan nga ginpahayag ni Presidente Duterte nga luyag nya nga iduso ang pagpasarado sang mga establisyemento paglab-ot sang tungang gab-i sang iya State of the Nation Address sang tinalikdan nga Lunes.
