Ginapanan-aw sang ekonomista kag anay National Economic and Development Authority Director General Cielito Habito nga mas mabudlay ang pagpanubo sa inflation sa pungsod bangud sa away sang Israel kag Hamas.
Suno kay Habito, antes pa man nga daan ang kumplikto sa tunga sang Hamas kag Israel, daku na nga factor ang presyo sang produktong-petrolyo sa pagsaka sang domestic inflation.
Mas daku ang pressure suno sa natungdan sang nag-umpisa ang away sa Middle East gani daku ini nga pagpanghangkat sa nabilin nga binulan subong nga tuig.
Photo: AP
May ekonomista man halin sa Moody’s Analytics nga nagpaandam nga ang amo nga gyera ang posible magpasaka sang presyo sang produktong-petrolyo sa $90 per barrel nga level para sa sustained period nga posible mangin rason naman kun ngaa may recession sa global economy.
Nahibaluan nga yara sa 6.1% ang inflation rate sang Pilipinas sang Septyembre kun sa diin nangin pinakadaku nga factors ang presyo sa pagkaon kag gatong.
Una na nga gin-athag sang Department of Energy nga indi maapektuhan ang oil price sa Pilipinas bisan pa sang amo nga kinagamo bangud indi man major oil exporters sa Pilipinas ang Israel kag ang Palestine.
Suno kay Oil Management Bureau Director Rino Abad, posible lamang nga magsaka ang presyo kun ma-involve na ang Iran sa gamo.
Ini bangud ang kaiping sini nga mga pungsod sa Persian Gulf — kaangay sang Saudi Arabia, Kuwait, kag Qatar — amo ang major oil suppliers diri sa pungsod.
Nahibaluan nga ang Saudi Arabia, Kuwait kag Qatar ang wala man sang direkta nga partisipasyon sa away, apang may reports nga ang Iran ang ginaduha-duhaan nga nag-finance sa Hamas agud nga mapatigayon amo nga pagpang-atake — butang nga ginpanginwala man sang ila nga lider.
