ILOILO CITY – Ginareklamo sang mga residente ang ginapahayag anomaliya sa listahanay sang benepisyaryo sang Social Amelioration Program sa Brgy. Camalig, Jaro, Iloilo City.
Sa interview sang Bombo Radyo kay May, isa sa mga tagreklamo, iya ginpahayag nga ang mga himata sang ila Punong Barangay ang nalakip sa nakabaton sang P6,000.
Suno kay May, magluwas sa himata sang Punong Barangay, nalakip man sa benepisyaryo ang mga may yara sang sarang kasubong sang seafarer nga wala pa nakabalik sa trabaho.
Ginpahayag ni May nga iya nahangpan nga tanan ang apektado sang krisis apang kun tani, ginprayoridad ang mga Persons With Disability, Senior Citizen kag ang mga tuman ka pigado.
Kasubong niya nga isa ka labandera, ginpahayag ni May nga tuman ka pigado ang ila pangabuhi apang mas madamo pa ang mas pigado sa ila lugar nga nagakinahanglan sang bulig.
Nagdepensa naman si Punong Barangay Nestor Loma batok sa nasambit nga akusasyon.
Sa pagpaathag ni Loma, ang iya isa ka bata ang nalakip sa benepisyaryo bangud nga kwalipikado man nga makabaton sang ayuda.
Suno kay Loma, may yara sang kaugalingon nga pamilya ang iya bata kag may yara man sang ginagatas nga lapsag.
Ang listahan nga nakapaskil sa barangay gym suno sa Punong Barangay ang ginpaagi sa validation sang Department of Social Welfare ang Development
Samtang, nakahanda ang Department of Social Welfare and Development nga maghatag sang bulig sa Criminal Investigation and Detection Group sa pagpatigayon sang imbestigasyon batok sa elected officials may kaangtanan sa anomaliya sa pagpanghatag sang Social Amelioration Program.
Sa interview sang Bombo Radyo kay Department of Social Welfare and Development 6 Director Ma. Evelyn Macapobre, iya ginpahayag nga wala pa sang abiso ang central office tuhoy sa mangin katungdanan sang ahensya sa imbestigasyon.
Suno kay Macapobre, ‘welcome’ para sa ahensya ang pagbulig sa Criminal Investigation and Detection Group agud nga masolbar ang tanan nga reklamo.
May kaangtanan diri, ginpahayag ni Macapobre nga nakahanda ang tanan nga records sang ahensya sa tion nga kinahanglanon sa imbestigasyon.
