ILOILO CITY – Arestado ang ‘gatekeeper’ sa Barangay Bakhaw, Mandurriao, Iloilo City sa ginpatigayon nga drug buy-bust operation sang Mandurriao Police Station kag City Drug Enforcement Unit.
Ang arestado amo si Ely Tupas, 40, residente sang distrito sang La Paz kag makabig nga street level individual.
Nabaklan si Tupas sang 15 grams nga droga nga may standard drug price nga P 102,000.
Sa interview sang Bombo Radyo kay Police Captain Val Cambel, hepe sang Mandurriao Police Station, iya ginpahayag nga isa si Tupas sa mga wala nadakpan sa ginpatigayon nga raid sang Regional Police Drug Enforcement Unit subong nga tuig kun sa diin, 32 ka mga indibidwal ang nagkaladakpan.
Suno pa kay Cambel, ang mga naga-engage sa illegal drug trade sa nasambit nga lugar ang may tagsa-tagsa ka papel.
Si Tupas ang gin-monitor sang kapulisan sa sulod sang halos isa ka bulan.
Sa subong, preso na si Tupas sa Mandurriao Police Station kag nagahulat na lamang sang resulta sang mga ginpatigayon nga tests.
