ILOILO CITY – Kalkalon pa sang Philippine National Police (PNP) ang mga kaso nga ginapangatubang sang high value target no. 2 sang Iloilo City kag ginatudlo nga anay hitman sang ginpatay nga drug lord nga si Melvin Odicta Sr.
Ini matapos nadakpan sa Mandurriao si Michael Hansilan, 40 anyos, anay residente sang Brgy. Malipayon, Iloilo City kag temporaryo nga nagpanago sa Pikit, Noth Cotabato.
Sa interview sang Bombo Radyo kay C/Insp. Juvy Navales, hepe sang Mandurriao Police Station, ginpahayag sini nga magluwas sa mga kaso nga illegal possession of firearms, tumuron pa nila ang iban pa nga mga kaso nga naangot sa pangalan ni Hansilan.
Nahibaluan nga si Hansilan ang ginatudlo nga suspek sa pagluthang patay kay SPO2 Rex Delos Reyes sa banwa sang Hinigaran, Negros Occidental kag kay PO1 Rizaldy Henarios nga assigned sa Regional Public Safety Batallion-6 nga nakaaway sini sa sugal
Nakahanda naman si Hansilan nga atubangon ang mga akusasyon batok sa iya.
Sa exclusive interview sang Bombo Radyo, iya ginpahayag nga nakibot ini sa madamo nga mga kaso nga ginaangot sa iya pangalan.
Suno kay Hansilan, ang nahibaluan lang sini nga kaso amo ang illegal possession of firearms.
Ginatugyan naman ni Hansilan sa iya abogado ang iban pa nga kaso nga gina-akusar batok sa iya.