JANIUAY, ILOILO – Ginpa-Bombo sang Punong Barangay sang Tambal, Janiuay, Iloilo ang ginapahayag indi husto nga patakaran sang Department of Social Welfare and Development sa pagpili sag magabaton sang P6,000 nga Social Amelioration Program.
Sa interview sang Bombo Radyo kay Punong Barangay Noli Suerte, iya ginpahayag nga wala ginsunod sang Department of Social Welfare and Development ang guidelines sa pagpili sang benepisyaryo.
Suno kay Suerte, sa 290 nga nalakip sa listahan, 241 lamang ang nahatagan sang ayuda sa Brgy. Tambal kag kalabanan sa mga wala nahatagan amo ang mga pigado nga naga-isahanon na sa pagpangabuhi.
Ginpahayag ni Suerte nga kun basehan ang guidelines, tanan nga pigado, naga-isahanon man ukon indi sa pangabuhi, ang dapat nga mahatagan sang ayuda.
Bangud sini, iya nga ginpalab-ot ang reklamo sa Municipal Social Welfare and Development Office apang ginpanugyanan lang siya nga magpasa sang formal complaint.
Ang nasambit nga reklamo suno sa Punong Barangay ang iya naman nga napalab-ot sa Department of the Interior and Local Government.
