ILOILO CITY – Ipasaka na sang Iloilo City Council sa Kamara ang isyu sa ginapahayag wala nagakaigo nga pagpanukot sang Panay Electric Company (PECO) sa mga kusumidor.
Ini matapos ginpasar sang Iloilo City Council ang resolusyon nga nagahingyo sang imbestigasyon sang House of Representatives ilabi na sang Committee on Energy angot sa mga reklamo batok sa Panay Electric Company (PECO).
Nangin unanimous ukon bug-os ang mga konsehal sa pagpasar sang amo nga resolusyon.
Sa interview naman sang Bombo Radyo kay Kagawad Joshua Alim nga amo ang nagduso sang imbestigasyon, ginpaathag sini kun nga-a magluwas kay Iloilo City Rep. Jerry Treñas, ginhingyo man nila ang bulig nanday Bayan Muna Rep. Carlos Zarate kag Kabayan party list Rep. Harry Roque.
Suno kay Alim, nahibaluan naman sang tanan nga ang law firm ni Treñas ang isa sa mga abogado sang Panay Electric Company gani indi sila makalaum nga siya ang magpanguna sang pagduso sang imbestigasyon.
Pabor naman ang mamalidha nga imbestigaran sang Kongreso ang Panay Electric Company.
Suno kay Trenas, indi siya magpamatok sa lihok nga paimbestigaran ang PECO ilabi pa kun ini ang kinahanglan.
Kadungan sini gin-ako ni Treñas nga ang iya law firm ang isa sa mga abogado sang kompaniya apang gin-athag nga indi siya aktibo nga nagauyat sang mga kaso sang PECO.
Nakahanda naman si Treñas nga mag-inhibit sa imbestigasyon sang Committee on Energy kun kinahanglan.