Hugot nga nagapanindugan ang Bagong Alyansang Makabayan (BAYAN) – Panay nga nagakadapat imbestigaran ang airstrikes ukon pagpamomba sang Armed Forces of the Philippines (AFP) sa engkwentro nga nagluntad sa tunga nila sang mga myembro sang New People’s Army (NPA) sa Sitio Burak, Barangay Alimodias, Miag-ao, Iloilo bangud ginapahayag sobra-sobra ini nga paggamit sang pwersa.
Sa interview sang Bombo Radyo kay Bryan Bosque, deputy spokesperson sang BAYAN-Panay, iya ginpahayag nga kuntani indi na magpanginwala ang mga katapo sang militar angot sa sobra-sobra nga paggamit nila sang pwersa agud dumpugon ang mga kasumpong nga rebelde.
”Gusto nila paggwaon nga wala sila naggamit sang sobra-sobra nga pwersa. Nakasaad sa laye sang gyera ukon laws of war, nga kun maggamit ka sang sobra-sobra nga pwersa para dumpugon ang imo nga kasumpong, tam-an na ina ya ka bawal ukon ginadumilian sang International Humanitarian Law.”
Suno kay Bosque, ang mga katapo sang militar na mismo ang nagpahayag nga kasubong nga nangin ‘corned beef’ ang lawas sang mga naigo sang bomba kun sa diin maathag ini nga paglapas sa International Humanitarian Law.
”Sila na mismo naghambal nga daw cornbeef na ang kalawasan sang sining mga naigo sang bomba.”
Pahayag niya, bisan rebelde pa nga grupo ang kasumpong sang militar, indi makatawo nga pamatyon ang mga ini sa pamaagi nga tuman ka brutal kag makahalanusbo nga halos indi na makilal-an ang mga bangkay.
“Kun tan-awon nimo, indi nani ya makatawo. Bisan rebelde pana sila, barbaro na ya nga style sang pag-inaway nga patyon mo nga indi na makilala ang imo nga kasumpong. Dako na ya nga ginadumili sa International Humanitarian Law.”
