𝗟𝗔𝗠𝗕𝗨𝗡𝗔𝗢, 𝗜𝗟𝗢𝗜𝗟𝗢 — Nagpanindugan ang ginatudlo nga suspek sa pagbuno-patay sa isa ka lalaki sa Barangay Poblacion Ilawod, Lambunao, Iloilo nga naglakat ang biktima antes paman nga nasapwan nga wala na ini sang kabuhi.
Ang biktima amo si JP Lego, 30, soltero, construction worker kag residente sang Barangay Bagongbong, Lambunao, Iloilo.
Samtang ang ginapahayag nga suspek amo si Ronaldo “Alyas Bugoy” Celiz.
Sa interview sang Bombo Radyo kay Celiz, iya ginpahayag nga matapos sila nga nag-inom-inom kaupod ang biktima, naglisensya ini nga may tabuon nga abyan, apang nagpabilin sang tinaga nga mabalik pa ini sa lugar kun sa diin sila naga-inom.
Suno kay Celiz, isa ka lipid sang makahulubog nga ilimnon ang ila naubos kaupod si alyas “Ryan” kag naghimos ang biktima nga maglakat.
Ginpahayag man sini nga sang naglakat na ang biktima, ang nabilin sa kamalig, siya, ang iya asawa, kag anak.
Gin-athag man sang natungdan nga matapos naglakat ang biktima, wala na ini nakabalik tubtob kagina sang aga.
Dugang pa ni Celiz nga antes paman nagtawag ang kapulisan sa iya agud imbetaran sa presinto, nahibaluan na niya nga patay na ang biktima.
Ginpanginwala man sini nga kilala niya ang abyan nga tabuon sang biktima matapos ini nga naglisensya nga malakat.
Ginsaysay man ni Celiz nga may panapton nga bayo, shorts, kag may bag kag cellphone nga dala ang biktima sang naglakat ini.
