ILOILO CITY – Ginreklamo sang Philippine Veterans Affairs Office ang ginapahayag unauthorized collection sang Son and Daughters Organization sa pamilya sang mga beterano nga nalubong sa Veterans Memorial Cemetery sa Brgy. Quintin Salas, Jaro, Iloilo City.
Sa interview sang Bombo Radyo kay Ma. Lydia Guzman, secretary sang Philippine Veterans Affairs Office, iya ginpahayag nga ang iban nga pamilya ang subong pa lang nakahibalo tuhoy sa indi otorisado nga pagpanukot ni Alexander Sion, presidente sang Son and Daughters Organization.
Suno kay Guzman, ang nagadumala sa Veterans Memorial Cemetery amo ang Philippine Veterans Affairs Office kag wala na sang iban pa nga grupo ukon organisasyon.
Ginpahayag ni Guzman nga ginapapati ang pamilya nga ang ila ginabayaran ang ginagamit para sa maintainance sang patyo kag pagbakal sang pagkaon sa tion nga may yara sang magabisita.
Sa pagkamatuod suno sa natungdan, wala sang dapat nga bayaran ang pamilya sang mga minatay magluwas lang kun ini ang ginahingyo sang Philippine Veterans Affairs Office.
Depensa naman ni Alexander Sion, presidente sang Son and Daughters Organization, ang ila nakolekta nga kwarta ang boluntaryo nga ginhatag sang pamilya.
Suno kay Sion, humalin sang una, nagahatag sila sang pamahaw ilabi na kun may yara sang ginapatigayon nga misa apang wala ini napadayon bangud nga indi man tanan ang makahatag sang kontribusyon.
Ginpahayag ni Sion nga sa natipon nga kwarta, ila na nga napakaayo ang kilid sa nitso kag ang iban pa nga guba sa patyo.
Magluwas diri, ila man nga ginahatagan sang pamahaw ang mga nagatambong sa misa nga ginapatigayon kag amo man ang mga gwardiya.
