Nag-desisyon ang isa ka Ilongga sa Jerusalem nga indi anay magpauli sa Pilipinas apisar sang nagasingki nga away sa tunga sang Iran kag Israel nga gin-intrahan pa sang Estados Unidos sang Amerika.
Sa interview sang Bombo Radyo kay Hanna Marie Kimberly Cabiles, tumandok sang Barangay Zona Sur, Banate, Iloilo, iya ginpahayag nga Hunyo 19 pa sang katapusan nga may nag-inulan nga missiles malapit sa ila nga area.
Tatlo ka tuig na si Cabiles sa Jerusalem kag nagatrabaho siya bilang caregiver sang isa ka Moroccan-Israeli nga naga-edad na sang 90-anyos.
Suno kay Cabiles, apisar may voluntary repatriation nga ginatanyag matapos ginpasaka sang Department of Foreign Affairs (DFA) ang crisis alert level sa Iran kag Israel sa Level 3, indi anay siya magbiya sa trabaho kag desidido ini nga tapuson ang iya nga lima ka tuig nga kontrata.
Pahayag pa sini, handum niya nga makapatindog sang balay. Magluwas diri, ginapa-eskwela pa sini ang iya nga manghod.
Dugang ni Cabiles, isa siya ka solo parent kag kinahanglan niya mag-trabaho para sa iya pito ka tuig nga bata nga subong yara na sa Grade 2.
“Indi pa ko magsugot nga mag-repatriate. I need this job. Kag I feel safe man sa Jerusalem. Holiest place ini, kag ginpangamuyo ko gid sa Ginuo nga ibutang ako sa safe place, so I am thankful gid nga ari ako diri,” suno kay Cabiles. Dugang sini, “kinahanglan magtrabaho para sa future sang akon bata.”
Sa kada may nagapadulong nga missiles, nagaalerto man ang Ilongga nga madala ang iya alaga pasulod sa mamad ukon sa bomb shelter. Ang problema suno sa iya, masami nga kaagahon nagaabot ang missiles gani nga kinahanglan pa pukawon ang iya alaga.
As of press time, sa 30,000 ka mga Pilipino sa Israel, masobra na sa 220 ang nag-request sang repatriation. Walo naman sa mga Pinoy ang nasamaran sa Iranian missile strikes kun sa diin isa ang nagapabilin sa kritikal nga kondisyon.#
