ILOILO CITY – Lauman nga may yara sang daku nga pagbag-o sa ginapatuman nga COVID-19 response sa syudad sang Iloilo umpisa sa masunod nga semana.
Sa interview sang Bombo Radyo kay Public Safety and Transportation Management Office head Jeck Conlu nga nagaserbe man nga Focal Person for COVID-19, iya ginpahayag nga mismo si Inter-Agency Task Force Deputy Implementer for Visayas Gen. Melquiades Feliciano ang nakasaksi kun ano ang sitwasyon sang syudad sang Iloilo kun COVID-19 ang pagahambalan.
Suno kay Conlu, nahangpan mismo si Feliciano kun ano na ang estado sang Western Visayas Medical Center Sub-National Laboratory sa pagproseso sang specimen kag ang problema sa tagsa ka hospital may kaangtanan sa bed capacity.
Bangud sini, ginaduso ni Gen. Feleciano ang pagpahamtang sang clustered clinic sa tagsa ka distrito agud magamit bilang swabbing facility kag ang pagpasangkad sang COVID-19 response sa barangay level.
Katuyu-an sang nasambit nga mga adjustment amo nga masolusyunan ang pagginutok sa mga hospital, mapadasig ang turnaround time sa pagpaguwa sang resulta sang COVID-19 test kag mas mapadali ang pagpatuman sang COVID-19 response sa tion nga may yara sang magpositibo sa virus.
