ILOILO CITY- Kumpirmado nga may violation ang Aggrisential Feeds, Inc. sa Sitio Wati, Barangay Talusan, Dumangas, Iloilo.
Ini may kaangtanan sa reklamo ni former Sangguniang Bayan Member Serafin Deduro Jr. sang Dumangas batok sa nasambit nga feed milling facility.
Sa interview sang Bombo Radyo kay Iloilo 4th District Board Member Rolly Distura, chairman sang committee on infrastructure sa Sangguniang Panlalawigan, iya ginpahayag nga matapos ang ila ginpatigayon nga ocular inspection sa lugar pagkatapos sang committee hearing sa Sangguniang Panlalawigan, napat-ud nga wala pa man natapos ang conversion gikan sa agricultural agud mangin industrial use apang naptindog na ang pasilidad kag iban nga istruktura.
Suno kay Distura, may posibilidad nga dagdagan sang nagakaigo nga penalidad ang nasambit nga kompaniya bangud sa nasambit nga violation.
Pahayag pa sang board member nga substantial man ang compliance sang kompaniya sa iban nga requirements apang kinahanglan nga i-comply ang iban pa gid nga rekisitos.
Gin-athag naman niya nga wala sang pamulitika sa likod sang nasambit nga tikang sang Sangguniang Panlalawigan.
Nahibaluan nga magkasumpong sa pulitika sanday Distura kag Dumangas Mayor Ronaldo Golez.
