JANIUAY, ILOILO – Ginatos ka pigado nga kabataan ang nangin benepisyaryo sang Oplan Papel ukon Paper and Pencil for Execellent Learning nga proyekto sang Janiuay PNP.
Sa Good Morning Philippines program, ginpahayag ni Police Captain Dadje Delima, hepe sang Janiuay Municipal Police Station, nga ang mga benepisyaryo sang nasambit nga programa amo ang kabataan nga naga-istar sa nabukid nga bahin sang Janiuay, Iloilo.
Suno kay Delima, pila lamang sa mga barangay amo ang Atimonan, Canawillian, Barasalon, Aeta Community sa Matag-ub kag Poblacion, President Roxas sa Capiz nga nalakip sa naapektuhan sang Bagyo Ursula.
Ginpahayag ni Delima nga ang Oplan Papel ang isa sa best pratices sang Janiuay PNP Police Community Relations agud nga makabulig sa mga pigado.
Magluwas sa school supplies, may yara man sang goods nga ginapanghatag sa mga benepisyaryo bilang paagi man agud nga mas mapalapit ang relasyon sang Philippine National Police sa komunidad.
Bilang public servant, ginpahayag sang natungdan nga katuyu-an sang Oplan Papel amo nga mapahangop ang kabataan nga indi dapat mahaylo sang rebelde nga grupo bangud lamang sa kapigaduhon.
