Target sang local government unit sang Sta. Barbara, Iloilo nga mabakunahan batok sa COVID-19 ang ginatos ka pumuluyo sa kada barangay sa nasambit nga banwa sa sulod sang isa ka semana.
Ang isa ka semana nga vaccination ang nag-umpisa na subong nga adlaw, Septyembre 20.
Sa interview sang Bombo Radyo kay Sta. Barbara, Iloilo Mayor Rema Somo, iya ginpahayag nga ginapangunahan sang LGU sang banwa sang Sta. Barbara, Iloilo, Philippine Red Cross Iloilo Chapter kag Provincial Health Office ang nagapadayon nga COVID-19 vaccination sa kada barangay.
Suno kay Mayor Somo, tubtob pa sa Byernes, Septyembre 24 ang inoculation gani nagapangabay siya sa mga pumuluyo nga hingalitan ang ini nga kahigayunan agud makapabakuna ilabi na nga ang vaccinators na mismo ang nagapadulong sa kada lugar.
Dugang pa sang alkalde, indi naman magsobra sa 500 ang target nga mabakunahan sa kada barangay.
