SARA, ILOILO – Nagapabilin sa gihapon sa hospital ang Sanguniang Bayan Secretary sang Sara, Iloilo matapos ang ginapahayag pagbato sa otoridad sa ginpatigayon nga buy bust operation sa nasambit nga banwa.
Nahibalu-an nga kahapon nga adlaw, ginpatigayon sang Provincial Intelligence Branch kag Provincial Drug Enforcement Team ang buy bust operation batok kay James Balsomo alyas Jaguar.
Sakay sa Nissan Navarra si Balsomo sang natigayon ang buy bust operation kag sang namutikan nga pulis ang iya naka-transaksyon, gilayon nga nagbunot sang armas-luthang ang drug personality nga ginakabig nga High Value Target level 2.
Bangud sini, napilitan ang otoridad nga magbato rason nga naigo sa dughan kag abaga si Balsomo.
Sa interview sang Bombo Radyo kay Police Major Jonathan Pinuela, pinuno sang Provincial Drug Enforcement Team, iya ginpahayag nga si Balsomo ang nagaserbe nga drug group leader sa probinsya sang Iloilo ilabi na sa 5th district.
Suno kay Pinuela, ang napatay nga drug lord nga si Melvin Odicta Sr., ang nagaserbe sadto nga supplier ni Balsomo.
Bangud nga napatay na si Odicta, mismo si Balsomo na ang nagakuha sang illegal drugs gikan sa direct supplier.
Bag-o pa man natigayon ang buy bust operation, ginpahayag sang natungdan nga madugay man ang surveillance sa illegal drug transaction ni Balsomo.
Wala pa sang pahayag ang pamilya Balsomo tuhoy sa isyu.
