ILOILO CITY – Hugot nga ginpanginwala sang isa sa mga ginatudlo suspek nga may kahilabtanan siya sa pagpatay sa waiter sa Brgy. North Fundidor, Molo, Iloilo City.
Ang biktima amo si Alejandro Panes, residente sang Zone III Brgy. Dulonan Arevalo, waiter sa MO2 bar sa Glicerio Pison Benigno Aquino Drive Mandurriao.
Sa interview sang Bombo Radyo kay Jurex Amoroso, anak sang gun man kag ginatudlo nga look out sa krimen, iya ginpahayag nga wala siya nakahalin sa ila balay sang natabo ang krimen.
Suno pa sa iya, kitaon sa closed circuit television sang barangay kun maggwa ang iya motorsiklo nga ginagamit niya bilang emergency responder.
Ginpanginwala man niya nga kilala niya si certain Rene Boy nga yara sa presuhan kag ginapahayag nagsugo sa iya amay nga patyon ang biktima.
Pahayag pa sang natungdan, nagakatulog na sila sang nag-abot ang mga pulis.
Gin-alegar niya nga ginlampusan siya sang armas sa iya dughan, ginlampusan sang martilyo sa ulo kag ginsapote sa atubang sang iya duha ka mga anak.
Nadula man suno sa iya ang kwarta nga ginhatag sang iya mga utod agud nga ipakay-o sang ila nga balay.
