Apisar bag-o pa lang gin-seryoso ang sports, nagapanglaka-ak na sa Metro Manila ang abilidad sang 17-anyos nga si Nash Candelario nga subong ginakilala nga Manila Meet Sprint King.
Tumandok sang Barangay Napnapan, Tigbauan, Iloilo ang pamilya ni Nash. Anak siya sang Ilonggo kag former Southeast Asian Games 400 meters gold medalist nga si Ernie Candelario.
Sa bag-o lang nagtapos nga Manila Athletics Meet sa Pasig City, tatlo gid ka gold medals ang nabulsa ni Nash matapos mangibababaw sa 400, 100, kag 200 meters sprint.
Sa interview sang Bombo Radyo sa Ilonggo athlete, ginpahayag sini nga nagpasakop siya sa Iloilo Invitation Sports Championship sang nagligad nga tuig, apang samtang yara sa 200-meter dash, nadasma siya. Ang iya mga kalutusan suno sa iya ang nagtulod sa iya nga mag-seryoso na sa sports kag mas mangin mapisan sa training ilabi na bangud coach man niya ang iya amay nga isa ka Southeast Asian champion.
Grade 12 na si Nash sa Adamson University sa Manila kag subong nagabaton sang offer halin sa top-tier universities sa Metro Manila para sa iya tertiary education.
Gin-share sini nga ultimate goal niya nga mangin kabahin sang national team sang Pilipinas, kag malapawan ang rekord sang iya amay. ##
