Nagapanalaytay sa dugo sang ginbansagan nga ‘sprint king’ sang National Capital Region ang kadasigon sa pagdalagan.
Si Pi Durden Wangkay ang nakakuha sang gold medal sa secondary boys’ 100m kag sa 200m events sa Palarong Pambansa 2025.
Ang 16-anyos nga solterito halin sa De La Salle Zobel ang nagsiling nga nakuha niya sa iya iloy ang amo nga abilidad.
Sang 1990s, ang iya iloy nga si Jonah Genilza ang nagdominar man sa Palaro paagi sa pagpangibabaw sa secondary girls’ sprint events kag nakahimo man sang record sa 400m nga naglawig sang masobra isa ka dekada antes ini na-break.
Si Jonah ang nangin kabahin sang team La Salle sa UAAP kag nakatiglawas man sang Pilipinas sa international meets bilang parte sang national team.
Siya subong ang coach sang iya anak nga nagahandom man nga maka-compete sa international nga lebel kaangay sang iya iloy.
