Ginakabig sang Iloilo City Police Office nga daku nga bulig ang gindonar nga mga bisikleta ni Senator Jinggoy Estrada.
Kahapon sang hapon, Abril 28, ang senador mismo ang nagpanguna sang ceremonial turnover.
Sa interview sang Bombo Radyo kay Plt. Col. Lindley Barrientos, Deputy City Director for Administration sang ICPO, iya ginpahayag nga mangin dako ini nga bulig sa ila subong nga may ginapatigayon nga austerity measure ang mga kapulisan samtang nagapangatubang sa krisis sa gatong ang bilog nga Pungsod.
Suno sa iya, magamit gid ini sang mga bike patrollers nga nagalibot sa siudad ilabi na sa mga gagmay kag sipot nga mga alagyan.
Pahayag man niya nga yara sa 30 ka mga bike sa subong ang ginapanag-iyahan sang mga partollers, apang ang iban diri amo ang iya mismo sang mga kapulisan.
Dugang man ni Barrientos, nagpahayag ang senador nga pagadungan pa niya ini sang 20 ka mga bike agud nga mas madamo pa nga mga kapulisan ang makagamit kag makabenepisyo diri.
