ILOILO CITY – Nagapati ang Punong Barangay sang San Isidro, Jaro, Iloilo City nga masobra sa P100,000 ang peke nga kwarta gikan sa suspek nga nadakpan sang damlag lang.
Sa interview sang Bombo Radyo kay Punong Barangay Felix Dureza, iya ginpahayag nga santo sa iya pagpangusisa kag sa pahayag ni Edmond Dela Torre, 21, sang nasambit nga lugar, nagalab-ot sa masobra sa P1 million ang peke nga kwarta.
Suno kay Dureza, ang iban sa mga peke nga kwarta ang yara sa Cebu kag iban pa nga lugar sa pungsod apang wala pa ma-trace kun sa diin gid naghalin ang peke nga 500 peso-bills.
Ginpahayag ni Dureza nga sa iya nga pagpangusisa, indi malayo nga may yara sang tawo nga yara sa likod sang pagpalapta sang peke nga kwarta.
Kadungan sini, nagpabutyag sang pagkadismaya ang Punong Barangay bangud nga tubtub subong, wala sang follow-up operation agud matumod ang ginhalinan sang peke nga kwarta.
Magluwas diri, nagpabutyag man sang pagkadismaya ang natungdan bangud nga wala siya nalakip sa ginhatagan sang pagkilala ni Iloilo City Police Office Director Police Col. Martin Defensor Jr. sa pagkabawi sang ginabanta P100,000 nga peke nga kwarta.
