LEON, ILOILO – May yara na sang lead ang Bureau of Fire Protection kun ano ang ginhalinan sang sunog sa merkado publiko sang Leon, Iloilo.
Sa interview sang Bombo Radyo kay Mayor Ma. Lina Holipas, iya ginpahayag nga may impormasyon na tuhoy sa ginhalinan sang sunog apang wala pa nakapasa sang report ang Bureau of Fire Protection.
Suno kay Holipas, natapos na ang mapping operation apang magapatigayon pa sang clearing operation sa sulod sang merkado agud masigurado nga wala na sang may nabilin nga live wire nga mahimo makatuga sang peligro.
Ginpahayag ni Holipas nga pangitaan niya sang paagi kun sa diin temporaryo nga makabaligya ang mga vendor apang sa subong, hatagan anay sang ligwa ang structural integrity assessment sa merkado apang ginabanta nga indi magnubo sa P10 million ang balor sang halit.
May kaangtanan diri, nagapasalamat ang alkalde sa tanan nga nagbulig agud nga mapalong gilayon ang kalayo nga nagsunog sa vegetable, fish kag meat section.
Nahibalu-an nga market day kun tani sang natabo ang sunog kahapon, Hulyo 18, apang sirado ang merkado bangud sa ginapatigayon nga disinfection.
