Magabyahe padulong sa Indonesia subong nga adlaw ang pamilya sang overseas Filipino worker nga si Mary Jane Veloso agud nga bisitahan siya antes pa man ang pormal nga pagsaylo sa iya sa presuhan diri sa Pilipinas.
Lakip sa magakadto didto amo ang iya duha ka kabataan, iya abogado, mga opisyal sang Department of Foreign Affairs kag representative halin sa OFW advocacy group nga Migrante.
Suno sa iya amay nga si Cesar, gusto man nila pasalamatan ang tanan nga nag-suporta kay Veloso amo man si Indonesian President Prabowo Subianto.
Pahayag sang amay, naghingyo si Mary Jane nga magdala sila sang pastillas para ipanagtag sini sa mga kaupdanan niya sa presuhan. Nagpahayag man ini nga dapat limpyuhan na ang iya kuwarto sa Nueva Ecija.
May nagaguwa nga reports nga mahimo mapabalik na diri sa Pilipinas si Mary Jane sa Disyembre 20 nga santo sa nauna nga pahayag sang Indonesian officials nga makapauli siya sa pungsod antes ang Paskuwa.
Matandaan nga ang 39-anyos nga Pinay ang gin-aresto kag ginsentensyahan sang kamatayon sang 2010 matapos nadakpan nga may sulod nga iligal nga droga ang iya luggage. Ginpanindugan naman sini nga biktima lamang siya sa amo nga sirkumstansya. Sang 2015, nakaluwas siya sa death sentence matapos naaresto ang iya recruiter.
