ILOILO CITY – Desidido nga magpasaka sang kaso ang mga ginikanan sang 3 ka estudyante nga ginlampusan sang mikropono sa ulo sang Assistant Choreographer sang Tribu Salognon sang Jaro National High School.
Ini ang kasunod sang pagsinapol nga ginpatawag ni Dr. Belinda Dinopol, Principal sang Jaro National High School kaupod ang 3 ka estudyante nga napilasan kag sang ila ginikanan apang wala nakatambong sa pagsinapol ang ginareklamo nga si Totchie Vergara.
Sa interview sang Bombo Radyo sa Iloy sang isa sa mga biktima, iya ginpahayag nga patapuson lang ang Dinagyang Festival antes nila pasakaan sang kaso ang Assistant Choreographer.
Suno sa Iloy, nagpromisa si Dr. Dinopol nga bayaran ang ila gingasto sa pagpakunsulta kag pagpabulong sa hospital.
Ginpahayag sang Iloy nga magluwas sa paglingin sang ulo, nagsuka pa ang iya bata matapos ang insidente.
Samtang, ginakasubo naman sang City Social Welfare and Development Office ang natabo sa 3 ka estudyante nga miyembro sang Tribu Salognon.
Sa interview sang Bombo Radyo kay Rara Ganzon, focal person sang City Social Welfare and Development Office, iya ginpahayag nga wala pa nakabaton sang formal complaint ang ila talatapan tuhoy sa nasambit nga insidente.
Suno kay Ganzon, ang tagsa ka ahensya sang gobyerno ilabi na ang mga eskwelahan ang may yara sang child protection committee nga amo ang magahatag sang solusyon kun may yara sang kasubong nga hitabo.
Ginpahayag ni Ganzon nga indi niya luyag nga pangunahan ang pamunu-an sang Jaro National High School sa pagsolbar sa nasambit nga problema apang kun may yara sang reklamo nga ipalab-ot sa City Social Welfare and Development Office, ila man ini nga aktuhan.
Ang Dinagyang Festival suno sa natungdan ang tion kun tani agud nga makatukib sang talento sang mga Ilonggo kag indi ang pagtuga sang kinagamo.
