ILOILO CITY – Nanari-sari nga cancer patients nga yara subong sa pag-inakop sang Friends Of Cancer Kids Iloilo.
Sa interview sang Bombo Radyo kay Dr. Socorro Martinez, Presidente sang Friends Of Cancer Kids Iloilo, iya ginpahayag nga nagalab-ot sa 28 ka cancer patients ang ila ginabuligan.
Sa pagpaathag ni Dr. Martinez, indi mahapos ang pagtatap sang pasyente nga may cancer bangud nga nagakinahanglan gid sang daku nga kantidad para sa chemotherapy.
Ginpahayag ni Dr. Ramirez nga ang tanan nga cancer patients ang nagakinahanglan sang chemotheraphy agud nga mahagan-hagan ang pagduging sang cancer cells sa lawas.
Lakip sa mga ginabuligan sang Friends Of Cancer Kids Iloilo amo ang mga pigado nga wala sang ikasarang sa pagpabulong.
Bag-o mangin isa ka beneficiary, kinahanlan suno sa natungdan nga may yara sang certificate of indigency ang aplikante.
Sa subong, natalana naman nga magasaulog sang ika-7 nga summer camp ang nasambit nga grupo para sa mga cancer patients rason nga nagapanawagan man ang grupo sang dugang nga volunteers.
Ang nasambit nga aktibidad ang patigayunon sa Mayo 27 tubtub 29, 2019 kag may tema nga Living life fully.
Bag-o ang summer camp, may yara naman nga patigayunon nga workshop para sa mga maga-volunteer sa Mayo 11.
Mabudlay para sa isa ka ginikanan nga makita nga naga-antos sa cancer ang iya anak.
Sa pagsaysay sa Bombo Radyo ni Maricel Palma sang Brgy. San Nicolas, Lapaz, Iloilo City, isa ang iya 15 anyos nga anak sa mga cancer patients nga ginabuligan sang Friends Of Cancer Kids Iloilo.
Bilang isa ka iloy, masakit para sa iya nga makita nga nabudlayan ang iya anak nga may yara sang acute lymphoblastic leukemia.
Sa pihak sini, ang pagka-positibo sang iya anak ang ginahimu niya nga kusog agud nga mangin mabakod sa pihak sang pagpanghangkat sa kabuhi.
Samtang, para naman sa amay nga si Erickson Fababier, tumandok sang Marinduque kag empleyado sang isa ka construction company diri sa syudad sang Iloilo, tuman nga kahadlok ang iya nabatyagan sanga nahibalu-an nga may yara sang cancer sa mata ang iya kamagulangan nga anak.
Una nga na-diagnose nga may cancer ang iya anak nga naga-edad pa lang sadto sang walo ka bulan.
Kasubong suno kay Fababier nga nadulaan siya sang paglaum nga mabuhi pa ang iya anak bangud sa nasambit nga balatian.
Sa subong suno sa iya, naga-edad na sang duha ka tuig ang iya anak kag padayon nga nagapakigbato sa cancer.
