ILOILO CITY – Igapatawag sang City Social Welfare and Development Office ang ginikanan sang mga minor de edad nga makapila na ka beses nga nadakpan bangud sa paglapas sa curfew for minors sa syudad sang Iloilo.
Sa interview sang Bombo Radyo kay Mr. Rare Gamala, social worker officer 1 sang City Social Welfare and Development Office, iya ginpahayag nga igapatawag nila ang mga ginikanan para sa isa ka counselling.
Suno kay Gamala, ini agud nga ipahangop sa mga ginikanan ang ila tagsa ka mga katungdanan.
Kun igakustodiya sang City Social Welfare and Development Office ang mga kabataan, mahulog ini sa dependent abuse kag neglect and abandon nga estado.
Sa tion nga ibalik sa ila pamilya ang kabataan, kinahanglan pa magpirma sang parent recover assessment report sa diin kun magpostibo ang resulta, ibalik ang bata sa iya ginikanan apang kun magnegatibo naman, mahimo nga ipaidlom sa ‘long term intervention’ ang minor de edad.
