ILOILO CITY – Mapadulong sa Mandurriao Police Station ang mga ginikanan sang mga pamatan-on nga na-ulamid sa kinagamo sa Diversion Road, Barangay San Rafael, Mandurriao, Iloilo City.
Sa interview sang Bombo Radyo kay Police Captain Benjie Dicen, deputy station commander sang Mandurriao Police Station, iya ginpahayag nga dal-on sang mga ginikanan ang mga kabataan mismo kag lakip ang mga birth certificates.
Kung balik-balikan, base sa imbestigasyon sang Mandurriao Police Station, ang apat ka mga sakay sang pick-up ang nagabyahe sa Diversion Road agud nga magpahangin.
Samtang, ang mga pamatan-on naman ang nagikan sa isa ka birthday party kag pauli na kuntani sa ila mga balay sa City Proper.
Sang naglabay na ang pick-up sa grupo sang mga pamatan-on, hinali lang nga nakabati sang lagapok kag gahud nagikan sa mga kabataan.
Gin-verify sang mga sakay sang pick-up ang amo nga gahud kag posible nga didto na may natabo nga indi pag-intindihanay sa duha ka bahin nga nagresulta sa komosyon.
Sa video nga nakuha sang Bombo Radyo, makita nga ginalagas pa sang mga pamatan-on ang pick-up apisar nga naglakat na ini.
Gilayon nga napadulong sa police station ang mga sakay sang salakyan.
Dugang pa ni Dicen, wala naka-inom ang mga sakay diri.
Kalabanan sa mga naulamid sa gamo ang mga estudyante pa lamang base sa pag-verify sang kapulisan.
