NEGROS OCCIDENTAL – Nagpatigayun sang pagpamulong-pulong si Leo Rey Yanson sa mga empleyado sang Vallacar Transit Inc. (VTI) sa Brgy. Bubog Talisay City Negros Occidental.
Ini matapos nga siya ang gin-ilisan bilang Presidente sang Vallacar Transit Inc. nga ginakabig pinakadako nga bus transport Company sa pungsod.
Ang nasambit nga pagtililipon ang gintambungan sang iya 85 anyos nga iloy nga si Olivia Villaflores Yanson kag sang iya utod nga si Janet Yanson.
Suno kay Leo Rey Yanson iya panindugan ang pagka Presidente sang kompaniya bangud nga siya ang gin-apoint sang iya iloy kag sang nagtaliwan nga amay.
Sang una siya nga nagpungko bilang Presidente suno kay Leo Rey, halos 1,800 lang ang units sa diin pagalpalon pa ang iban sa mga ini.
Sa subong suno sa iya nagdangat na sa 4,800 ang units kag nangin mas maayo na ang serbisyo kag ginkilala pa nga pinakadako nga bus transport company sa Pilipinas kag sa Asya.
Wala man siya sang labot suno sa iya sa shares sang kumpaniya kag sa inaway-away sang iya mga utod bangud ang iya lang tinutuyo amo ang para sa kaayuhan sang kompaniya.
Wala man siya suno kay Leo Rey sang ginkuha nga kwarta sa ila kompaniya bangud ang sweldo niya bilang Presidente ang wala na niya ginakuha sa baylo ginabalik kag ginabulig nalang iya ini.
Nasubuan lang siya suno sa natungdan bangud sa nagluntad nga hitabo sa tunga nila sang iya mga utod.
Sang nakaligad pa siya nga tuig naglisensya sa iya iloy nga mag-untat na sa pagpadalagan sang ila kompanya apang indi magsugot ang iya iloy rason nga nagpabilin siya sa posisyon.
Nagpanawagan man siya sa iya apat ka utod nga kuntani magpalapit man ang mga ini sa iya iloy bangud 85 anyos na ini.
Ginhingyo man niya ang mga empleyado nga indi pagbayaan ang iya iloy tubtob nga ini ang nagakabuhi.
Ginpasigurado man sang natungdan nga wala sang dapat kahadlukan ang mga empleyado bangud padayun siya nga magatindog para sa ila kinamatarung.
