Nagpa-Bombo ang tag iya sang isa ka motorsiklo nga biktima man sang motornapping sang nagligad nga Pebrero 14.
Suno sa tag-iya, gin-park lang sini ang iya motorsiklo nga RS HONDA 125 Fi 2023 nga may plate number nga F989AW sa tabok sang isa ka laundry shop sa kilid dalan sa Tanza Zone 1, Brgy. Rizal Estanzuela, Iloilo City Proper.
Suno pa sa tag-iya mga alas-10:20 sang gab-i sang ginbilin lang sini ang iya motorsiklo.
Apang sang gin-check na sini las-12:00 sang tungang gab-i, wala na ang iya nga motorsiklo.
Gilayon man sini nga ginpa-blotter ang insidente sa Iloilo City Police Station 7 apang asta sa karon padayon pa ang imbestigasyon.
Kasunod naman sang bag-o nga kaso sang motornapping, ginmando ni Mayor Raisa Treñas sa Iloilo City Police Office (ICPO) sa pagpanguna ni Director PCol. Wilbert Parilla nga tutukan ang imbestigasyon sa nasambit nga mga kaso.
Sa interview sang Bombo Radyo kay Joy Fantilaga-Gorzal, spokesperson ni Mayor Trenas, iya ginpahayag nga samtang padayon ang imbestigasyon, hugot man ang pagbantay sang kapulisan agud matapna ini nga pagkinawatay.
Ginpanawagan man sang mga otoridad sa publiko nga mag-report gilayon sang insidente agud ma-track ang mga suspek sang pagpangawat sang motorsiklo.
Nagpahanumdom man ini sa mga tag-iya sang motorsiklo nga siguruhon ang pag-lock sang ila salakyan kag indi pagbilin ang yabi agud indi mahatagan sang tsansa ang mga kriminal nga makahimo sang ila iligal nga buluhaton.
