𝗜𝗟𝗢𝗜𝗟𝗢 𝗖𝗜𝗧𝗬 —Napun-an sang kasubo ang pagdul-ong sa pinaka-ulihi nga palahuwayan ni former Ingore, La Paz Punong Barangay Ernie Poral.
Ini kasunod man nga ginluthang-patay ang opisyal sang Agosto 5 sa Baldoza, La Paz, Iloilo City.
Ang suspek amo si Nilo Guardaya,39, residente sang Barangay Igcocolo, Guimbal, Iloilo.
Sa interview sang Bombo Radyo kay Edwin Poral, utod ni former Punong Barangay Ernie Poral, iya ginpahayag nga dako ang ila nga pagpasalamat sa mga pumuluyo, abyan, kay Iloilo City Mayor Jerry Treñas, Iloilo City Vice Mayor Jeffrey Ganzon, kag Iloilo City Representative Julienne “Jam-jam” Baronda bangud sa ila ginhatag nga bulig.
Suno kay Poral, tubtob subong, indi niya sa gihapon makita ang rason kag motibo sang suspek kon ngaa ginpatay sini ang iya nga utod.
Ginpahayag man sini nga wala siya sang may nahibaluan nga may kontra ang iya utod bangud madamo naman ini sang nabuligan.
Gintumod man sini nga may mga pagpamahog sa gihapon sa ila nga pamilya, kaangay na lamang sa natabo sa iya hinablos, kon sa diin, ginsundan sang motorsiklo.
Gin-ako man sang natungdan nga apisar siya ang wala gid nagahatag sang kompyansa nga mangin kampante ilabi na kon nagamaneho kag nagaguwa ini sa puluy-an.
