ILOILO CITY – Ginpa-Bombo sang barangay official sang Brgy. Lopez Jaena Sur, La Paz ang nagawayway nga wiring nga tuga pa sang nag-agi nga Bagyong Odette sang Disyembre.
Sa interview sang Bombo Radyo kay Punong Barangay Johny Lego, iya ginpahayag nga sang naglaslas si bagyong Odette, natumba ang poste sang kuryente nga gilayon naman nga gin-aktuhan sang More Electric and Power Corporation apang wala nabalikan ang nagawayway nga mga kable.
Wala ini gintandog sang barangay sa kahadlok nga basi may yara sang live wire.
Suno kay Lego, sang ginpalab-ot sa More Power, gin-refer sang service provider sa Public Utilities Group of Iloilo (PUGI) bangud iya sang mga telecommunications company ang mga kable nga nagawayway.
Ang PUGI ang yara sa idalom sang opisina ni Engr. Randy Pastolero, ang Executive Assistant to the Mayor for Energy.
Ginakatingalahan ni Lego kun ngaa kinahanglan pa ang request letter nagikan sa barangay bangud madamo man sang mga spaghetti wires sa syudad apang wala ginasapak sang natungdan nga opisina.
