ILOILO – Nagapadayon ang mga hinampang sa 2018 State Colleges and Universities Athletic Association (SCUAA) Games na ginaganap sa San Jose, Antique.
Kapin 7,000 ka mga delegado gikan sa nagkalain-lain nga rehiyon sa bug-os nga pungsod, ang nagapaindis-indis karon sa mga sports competition.
Nagaserbe nga host ang University of Antique samtang fully booked naman ang mga hotels sa probinsiya.
Ginpahayag ni Antique Governor Rhodora Cadiao, nga nangin sports destination na ang iya probinsiya matapos ang madinalag-on nga pag-host nila sang Western Visayas Regional Athletic Association Meet 2017 kag Palarong Pambansa 2017.
Nalaktan naman sang kasubo ang pagbukas sang 2018 SCUAA Games.
Gindumdom kag ginhatagan sang tribute ang ginpatay nga Philippine Association of State Universities and Colleges (PASUC) president nga si Dr. Ricardo Rotoraz nga ginluthang sa Cagayan de Oro City sang nakaligad nga tuig.
Ginpasiga ang mga cellphones kag nagpalupad sang puti nga lobo bilang pagdumdom sa ginpatay nga PASUC president.
Naghatag naman sang mensahe ang anay action star kag taekwondo champion nga si Monsour del Rosario nga karon kongresista na sa una nga distrito sang Makati.