Nakakita sang bag-o nga perspektibo sa legislation si Girl City Vice Mayor Izabela Margaret Dimla matapos ang mainit nga deliberasyon sa Iloilo City Council Session.
Suno kay Dimla, naging eye-opener para sa isa iya ang pagtambong sa aktuwal nga legislation sang Sangguniang Panlungsod, lakip ang pag-adoptar sang DILG Legal Opinion No. 95, series of 2025 sa Internal Rules of Procedure (IRP) sang konseho.
Pahayag pa niya, dako nga pribilehiyo kag mapuslanon nga eksperyensya ang pagserbe bilang Girl City Vice Mayor, bangud mas naintindihan niya kung paano nagahimo sang mga layi kag nagapadalagan sang mga proseso ang konseho.
Dugang pa niya, ini nga eksperyensya mahimo man nga makaimpluwensya sa iya desisyon kung ano nga career path ang iya pilion sa palaabuton, ilabi na nga halin pa sang gamay siya, may interes na siya sa pagtuon sang abogasya.
Apang, aminado siya nga medyo nagpalayo siya sa sini nga handum, indi bangud nadula ang iya interes, kundi bangud wala siya masyado nakalambot ukon na-involve sa amo nga field.
Paathag niya, paagi sa Boys and Girls Week Celebration, nabuksan liwat ang iya panan-aw sa kalibutan sang legislation kag sa importansya sang papel sang mga opisyal sa paghimo sang desisyon nga nagaapekto sa publiko.
Ang iya eksperyensya mas nangin makahulugan pa bangud natun-an niya ini sa tunga sang aktuwal nga sesyon sang konseho, diin nagluntad ang mainit nga pagbinaylohanay sang opinyon antes gin-adoptar ang nasambit nga opinion nga may kaangtanan sa limitado nga legislative functions ni Vice Mayor Lady Julie Grace “Love-Love” Baronda.
Samtang, ginpahayag ni Dimla nga ang amo nga programa nagahatag sang oportunidad indi lamang sa iya kundi pati sa iya mga kaupdanan nga mas makilala ang nagkalain-lain nga propesyon kag makapamalandong sa ila pagapilion nga career sa palaabuton.
Text by: 𝐁𝐨𝐦𝐛𝐨 𝐂𝐲𝐫𝐞𝐧𝐞 𝐀. 𝐍𝐚𝐬𝐢𝐬
