Ginapanan-aw nga maganubo sang 57 percent subong nga tuig ang global international travel demand bangud sang border controls kag quarantine measures nga ginapatuman.
Suno sa British research firm nga Oxford Economics Ltd., indi pa magbalik ang demand sa overseas tourism tubtob sa 2024 bangud sang epekto sang pandemya kag sang negatibo nga panan-awan sang publiko sa international travel lakip na sa leisure kag business travel.
“There is immense difficulty in striking the correct balance between ensuring the virus remains under control while reviving tourism,” pahayag sang nasambit nga research firm apisar may pila na ka mga pungsod nga nagpahalog sang restrictions kag nagbukas sang mga borders.
May kaangtanan diri, ginaforecast man nga mas madasig nga makarecover ang domestic travel demand ipaanggid sa international travel.
Ginpahayag nga makabalik na sa ‘2019 nga level’ ang domestic travel sa kalabanan nga mga pungsod sa 2022.
Ang ginatumod nga pagnubo sang 57 percent ang equivalent sa 847 million fewer arrivals. Labi nga mangin apektado ang North American destinations kag magasunod ang Asia-Pacific.
Suno pa sa report, mangin labi nga apektado ang major city destinations ipaanggid sa rural areas.
Ang 10 ka syudad nga maga-eksperyensya sang biggest percentage falls ang ginapanan-aw nga magahalin sa Estados Unidos. #
(with reports from Kyodo News)
