Pasidunggan sang Ukraine ang mga border guards sa Snake Island nga ginpatay matapos nagpamalibad nga mag-surrender sa Russian war ship sa Black Sea.
Suno kay Ukrainian President Volodymyr Zelensky, iga-isyu niya ang posthumous honors sa security forces bangud makabig sila nga baganihan.
Nag-guwa naman subong ang isa ka audio clip nga amo ang ginapahayag nagaunod sang paandam sang Russian warship sa Ukrainian soldiers nga amo ang nagabantay sa Snake Island sa Black Sea.
Matapos ang ila pagpakatig-a nga magsurrender, nagpalupok ang Russians.
13 ka mga guards ang napatay.
Ang Snake Island ang yara nahamtang sa southeast border sang Ukraine. Gin-atake ini sang Hwebes nga adlaw.
Sandig sa report sang Ukrainian media, duha ka naval vessels ang nagpalapit sa mga guards.
Sa transcript sang audio exchange, nabatian ang isa sa Russian ships nga nag-radyo sa outpost sang mga guard. “This is a Russian warship, I repeat. I suggest you surrender your weapons and capitulate otherwise I will open fire. Do you copy?” suno sa Russian ship.
Sunod nga nabatian ang isa ka Ukrainian guard. Ang siling, “This is it.” Pagkatapos, ginpamangkot sini ang isa man ka guard: “Should I tell him to go f*ck himself?”
May isa man ka guard nga nagsabat, “Just in case.” Sunod nga nag-radyo ang una nga guard: “Russian warship, go f*ck yourself.”
May yara man sang isa ka short video sa amo nga insidente nga nagguwa man subong sa social media. Makit-an diri ang duha ka soldado nga yara man sa Snake Island kag naga-livestream sang natabo. Nagasuksok ang mga soldado sang military helmets.
Sunod nga nabatian ang paglupok, nagsinggit ang isa, kag napatay ang video.
Sang ulihi, ginkumpirma sang otoridad nga patay gid ang tanan nga guards sa Snake Island. Sa Ukraine, ginatawag ang amo nga isla nga Zmiinyi Island. ##
