Ginahandaan na sang gobyerno sang Pilipinas ang Alert Level 1 status sang pungsod bangud man sa padayon nga pagbaylo sang COVID-19 pandemic sa endemic state.
Ini ang gin-aku man sang Department of Health (DOH).
Suno kay Health Undersecretary Maria Rosario Vergeire, ang alert Level 1 ang makabig “new normal” sang Pilipinas.
Ini ang igadeklara kun manubo na ang transmission case, ang total hospital utilization rate kag intensive care unit rate.
Dugang pa ni Vergerie, sa idalom sang new normal, specific ukon sa pili lang nga lugar ipatuman ang mga restrictions ilabi na sa areas nga may mataas nga infection rate.
Dulaon naman ang limitasyon sa kapasidad ukon capacity rate sa mga establisyimento, outdoor man ukon indoor, kag lakip naman ang sa transportasyon.
Apang, kinahanglan sa gihapon nga sundon ang minimum public health standard kaangay pagsuksok sang facemask kag pag-obserba sang physical distancing, kag iban pa nga health protocols.
Apisar sa padayon nga paghalug sang COVID-19 restrictions, gin-athag sang DOH nga ang ulihi nga pagadulaon ang pagsuksok sang facemask.
