ILOILO CITY – Ginpasiguro sang gobyerno nga hatagan sang hustisya ang kamatayon sang Ilonggo OFW nga ginpatay sa South Korea.
Sa interview sang Bombo Radyo, ginpahayag ni Special Assistant to the President Christopher “Bong” Go nga magapadulong sila ni Presidente Rodrigo Duterte sa South Korea sa Hunyo 3.
Ini ang ginpahayag ni Go kadungan sang pagbisita sa puluy-an sang pamilya ni Angelo Claveria sang Barangay Rizal Ilawod, Cabatuan, Iloilo.
Suno kay Go, isa sa katuyuan sang ila pagpadulong ni Duterte sa South Korea amo ang pagpakigsapol sa South Korean government tuhoy sa kamatayon ni Angelo Claveria.
Ginpahayag dugang ni Go nga desidido ang presidente nga mahatagan sang hustisya ang kamatayon sang Ilonggo OFW.
Kaupod ni Go nga nagbisita sa puluy-an sang pamilya Claveria amo si Presidential Communications Operations Office (PCOO) Sec. Martin Andanar.
Dala sang duha ka opisyal ang financial assisstance kag iban pa nga bulig para sa pamilya Claveria.