ILOILO CITY – Nagapati ang Simbahang Katolika nga may yara sang bastante nga pondo ang gobyerno para ibulig sa mga Overseas Filipino Workers.
Sa ginpatigayon nga misa sa Jaro Metropolitan Cathedral nga ginpangunahan ni Msgr. Meliton Oso, director sang Jaro Archdiocesan Social Action Center, nangin sentro sang iya homily amo ang importansya sang pagbulig sa mga nagakinahanglan.
Suno kay Msgr. Oso, makaluluoy ang kahimtangan sang mga Overseas Filipino Workers nga temporaryo nga nagatinir sa isa ka hotel sa syudad sang Iloilo bangud nga wala sila sang bulig nga nabaton halin mismo sa Overseas Workers Welfare Administration.
May kaangtanan diri, wala napunggan ni Msgr. Oso nga magpabutyag sang pagkadismaya bangud nga ang Iloilo City Government pa ang nagpadala sang bulig sa mga nagutuman nga Overseas Filipino Workers.
Ang nasambit nga ahensya suno sa natungdan ang nagabaton sang share halin sa kita sang mga ginakabig nga Moder-Day Heroes apang kasubong nga nagapabaya sila sa ila katungdanan.
Nagakadapat nga mayor nga tutukan sang gobyerno amo ang kaayuhan sang mga Overseas Filipino Workers ilabi pa nga ang iban sa ila ang nagpositibo sa Coronavirus Disease 2019 (COVID-19).
