QATAR – Nagapakig-angot ang gobyerno sang Pilipinas sa Qatar agud nga mahatagan sang bulig ang mga Overseas Filipino Workers nga nadulaan sang trabaho bangud sa ginapatuman nga lockdown.
Sa interview sang Bombo Radyo kay Jay Teves, Officer-in-Charge sang Advocacy and Social Marketing Division sang Overseas Workers Welfare Administration, iya ginpahayag nga may yara sang assistance nga igahatag ang gobyerno sang Pilipinas para sa mga Overseas Filipino Workers nga nadulaan sang trabaho.
Suno kay Teves, indi kinahanglan nga personal gid nga magpadulong sa talatapan sang Philippine Overseas Labor Office sa Doha kundi sa baylo, mahimo nga magpakig-angot paagi sa official website, official social media accounts ukon sa telephone number.
Ginpahayag ni Teves nga sa subong, wala pa siya sang may nauyatan nga guidelines tuhoy sa mangin benepisyaryo kag kun ano ang proseso sa pagpanghatag sang ayuda.
Ang pat-od lang suno sa natungdan amo nga magahatag sang bulig ang Philippine Overseas Labor Office, depende sa kinahanglanon sang Overseas Filipino Worker.
