ILOILO CITY – Nagpadala na ang gobyerno sang Pilipinas sang food packs kag COVID-19 care packages sa mga overseas Filipino worker (OFW) nga apektado sang liwat nga pagsaka sang COVID-19 cases sa Macau, China.
Sang Lunes, nagpatuman sang isa ka semana nga lockdown ang Macau agud nga mapunggan ang pagdamo pa sang kaso sang COVID-19.
Suno kay Department of Migrant Workers (DMW) secretary Toots Ople, ang Overseas Workers Welfare Administration (OWWA) ang nagahatag man sang bulig pinaagi sa pag-handle sang financial assistance sa mga nagpositibo sa virus nga nagabalor sang P11,253 sa tagsa ka apektado nga OFW.
Suno naman kay OWWA Administrator Hans Cacdac, nasuguran na ang pagpanghatag sang food packs sang Myerkules sang gab-i.
Samtang, magalunsyar na ang gobyerno sang One Repatriation Command Center sa masunod nga semana.
Suno kay Ople, isa na lang ang pangayuan sang bulug sang pamilya sang mga OFW, ang shipment sang bangkay, ang repatriation sang stranded kag ang mga ginpang-abuso nga mga OFWs.
Dugang pa niya, sila na mismo ang magatawag sa pamilya kag maghatag sang update kun bala kamusta na ang repatriation assistance para sa mga pamilya nila.
