Nakapamati na bala ang tanan sa “Christmas in Our Hearts”?
Basta magsugod na gani ang ber months, awtomatiko na dayon nga nagatukar ini nga musika nga himo sang Ilonggo singer-songwriter nga si Jose Mari Chan!
Kaangot diri, isa ka musical nga maga-feature sa music ni Chan ang iga-stage sa maabot nga Nobyembre.
Suno sa Filipino theater company nga Repertory Philippines, ang musical nga “Going Home To Christmas: A Jose Mari Chan Musical” ang patigayunon sa Nobyembre 29 sa Carlos P. Romulo Auditorium sa RCBC Plaza sa Makati.
Indi lamang sa Yuletide hit nga “Christmas in Our Hearts” kilala si Chan kundi mangin sa iya hit songs nga “Afraid for Love to Fade,” “Can’t We Start Over Again,” “Please Be Careful With My Heart,” “Can We Just Stop and Talk Awhile,” kag “Beautiful Girl.”
Siya ang naga-uyat sang record sa best-selling albums sa Philippine music history nga amo ang Christmas in Our Hearts (1990) sa number one, kag ginasundan sang iya 1989 record nga Constant Change.
Nahibaluan nga tinuig na nga popular ang musicals sa Pilipinas nga naga-sentro sa discography sang Pinoy artists.
Lakip diri ang Rak of Aegis nga naga-feature sa Aegis; Eto Na! Musikal nAPO nga inspired sa mga kanta sang Apo Hiking Society; Sa Wakas nga kanta naman sang alternative rock band nga Sugarfree; kag ang Ang Huling El Bimbo nga tribute sa music sang influential ’90s band nga Eraserheads.#
